वामदेवको प्रस्ताव पनि ओलीद्वारा अस्वीकार, तर ओलीले राखे स्थायी समितिमा, यस्तो बन्यो स्थायी समिति

काठमाडौ । एकता राष्ट्रिय अभियान सञ्चालन गर्दै आएका एमाले नेता वामदेव गौतमले २८ फागुनको निर्णय फिर्ता लिन गरेको आग्रहलाई अध्यक्ष केपी ओलीले अस्वीकार गरेका छन् । 

प्रधानमन्त्रीनिवास बालुवाटारमा बिहीबार राति भएको भएको डिनर मिटिङमा गौतमले अवैधानिक बैठकबाट निर्णय भएको भन्दै फिर्ता लिन आग्रह गरेका हुन् । ओलीले पार्टी काममा फर्कन अनुरोध गरेपछि गौतमले २८ फागुनको निर्णय फिर्ता लिन भनेका थिए । तर, ओलीले २८ फागुनका निर्णय फिर्ता नहुने जवाफ दिएका थिए । त्यसपछि गौतम तपाईंसँग आउन सक्दिनँ भन्दै बिदा भएका थिए ।

यसअघि वरिष्ठ नेता माधवकुमार नेपालले पनि ओलीसँगको भेटमा २८ फागुनको निर्णय फिर्ता लिन आग्रह गरेका थिए । नेपालको आग्रहलाई पनि ओलीले अस्वीकार गरेका थिए । ओली र नेपालबीच बुधबार र बिहीबार भेटवार्ता भएको थियो । 

गौतमले प्रेस नोट जारी गर्दै भनेका छन्, ‘पिएमनिवास बालुवाटारमा डिनर मिटिङ भयो । उहाँले पार्टी काममा आफूसँग फर्कन अनुरोध गर्नुभयो, मैले गत फागुन २८ गते तपाईंले गर्नुभएको अवैधानिक मिटिङका निर्णय फिर्ता लिन अनुरोध गरेँ । उहाँले ती फिर्ता हुँदैनन् भन्नुभयो । त्यसो भए म तपाईंसँग आउन पनि सक्दिनँ भनेर जवाफ दिएँ । डिनर चल्दै थियो नमस्कार गरेर म बिदा भएँ ।’

नेकपा एमालेद्वारा स्थायी कमिटी गठन

नेकपा एमालेले स्थायी कमिटी गठन गरेको छ । बालुवाटारमा जारी दसौं महाधिवशेन आयोजक कमिटी बैठकले स्थायी कमिटी गठन गरेको हो ।

माओवादीबाट आएका नेताहरूलाई समेत समेटेर स्थायी कमिटी गठन गरिएको छ । स्थायी कमिटीमा झलनाथ खनाल-माधवकुमार नेपाल पक्षका नेता भने राखिएका छैनन् ।

एक केन्द्रीय सदस्यका अनुसार स्थायी कमिटी सदस्यमा केपी ओली, वामदेव गौतम, ईश्वर पोखरेल, रामबहादुर थापा , विष्णु पौडेल, सुवास नेम्वाङ, शंकर पोखरेल, प्रदीप ज्ञवाली, लेखराज भट्ट, टोपबहादुर रायमाझी,सत्यनारायण मण्डल, विष्णु रिमाल, छविलाल विश्वकर्मा, पृथ्वीसुब्बा गुरुङ, रघुवीर महासेठ, केशव बडाल, मणि थापा र पुष्पराज कँडेल रहेका छन् ।

बाँकी सदस्यहरु पछि थप गर्ने निर्णय पनि बैठकले गरेको छ ।