लिस्बन । नेपाली जनसम्पर्क समिति पोर्चुगलले क्रियाशिल सदस्यहरुको नामावली टुङ्ग्याएर केन्द्रमा पठाएको छ । शनिबार बसेको समितिको बैठकले ५४३ जना क्रियाशिल सदस्यहरुको नामावलीलाई अन्तिम रुप दिएको हो ।
समितिले ३८ जना सदस्यको नविकरण र बाँकी ५०५ जना सदस्यलाई नयाँ क्रियाशिलता दिएको हो । कुल ५४३ सदस्यबाट ३० युरोका दरले १९ लाख पाँच हजार रुपैयाँ संकलन भएको छ । ५४३ जना क्रियाशिल सदस्यको नामावली र सदस्यता शुल्क वापतको रकम केन्द्रमा पठाएको जसस पोर्चुगलका कार्यबाहक अध्यक्ष वकिल केसीले जानकारी दिए । यो सँगै पार्टीको आगामी चौधौं महाधिवेशनमा पोर्चुगलबाट तीन जना महासमिति सदस्य र चार जना महाधिवेशन प्रतिनीधि सहभागि हुन पाउने भएका छन ।
जससले पोर्चुगलमा विगत ६ महिना अघिदेखि क्रियाशिल सदस्यता नविकरण तथा बिस्तार अभियान सुरु भएको थियो । क्रियाशिल सदस्यको नामावली टुङ्गिएकोले अब समितिले अधिवेशन गर्नुपर्नेछ । यो सँगै जसस पोर्चुगलमा चुनावी सरगर्मी पनि सुरु भएको छ । नेतृत्वसहित अन्य पदमा आकांक्षीहरु धेरै भएकोले यहाँको अधिवेशनलाई बिशेष रुपमा हेरिएको छ ।
जसस पोर्चुगलको अधिवेशनका नेतृत्वको लागि चर्को प्रतिस्पर्धा हुने ठानिएको छ । भित्री रूपमा अध्यक्ष लगायतका पदाधिकारीहरुमा विभिन्न व्यक्तिहरुले लविङ सुरु गरेको बुझिएको छ ।
केन्द्रले युरोपका जससहरुको निर्धारित मितिमै अधिवेशन गराउनका लागि नेपाली काङ्ग्रेस जनसम्पर्क समिति समन्वय विभागका सदस्य दिल गुरुङलाई जिम्मेवारी दिएको छ । गुरुङले पोर्चुगलसहित युरोपभित्रका १५ वटा नेपाली जनसम्पर्क समितिहरुको अधिवेशन गराउनु पर्नेछ ।
FOUNDER/CHIEF EDITOR :