एजेन्सी, लिस्बन – पोर्चुगलका प्रधानमन्त्री लुइस मोन्टेनेग्रोले संसदमा विश्वासको मतको लागि प्रस्तावको घोषणा गरेका छन् ।
जसकारण पोर्चुगलमा राजनैतिक अस्थिरता सृजना हुने होकी भन्ने सम्भावना देखिएको छ । निजी कम्पनीहरूबाट रकम लिएको आरोपमा उनी संसदमा यस प्रस्तावको सामना गर्दैछन्, जहाँ सरकारसँग बहुमतको अभाव छ र यो प्रस्ताव असफल भएमा सरकार ढल्न सक्छ।
विपक्षी समाजवादी पार्टी (PS) र दक्षिणपन्थी पार्टी चेगा (Chega) दुवैले विश्वासको प्रस्तावको पक्षमा मतदान नगर्ने बताएका छन्। समाजवादी पार्टीका महासचिव पेद्रो नुनो सान्तोसले भने, “हाम्रो स्वास्थ्य क्षेत्र लगायतका गम्भीर समस्याहरूको कारण हामी यस सरकारलाई विश्वासको प्रस्तावमा समर्थन दिन सक्दैनौं।”
प्रधानमन्त्री मोन्टेनेग्रो हाल आफ्नो पारिवारिक व्यवसायसँग सम्बन्धित घोटालामा फसेका छन्। उनको परिवारद्वारा सञ्चालित परामर्श कम्पनी स्पिनुमविवाले विभिन्न कम्पनीहरूबाट मासिक ९,००० युरो लिने गरेको खुलासा भएको छ, जसमा सोलभर्डे कम्पनीले मात्र मासिक ४,५०० युरो योगदान गर्दछ।
प्रधानमन्त्री मोंटेनेग्रोले यो प्रकरणपछि कम्पनीबाट आफू र आफ्नो परिवारको नाम हटाएको स्पष्टीकरण दिएका छन् र पार्टीहरूलाई सरकारको निरन्तरता सुनिश्चित गर्न आह्वान गरेका छन्। तर, यदि राजनीतिक स्पष्टिकरण आवश्यक परे, भने संसदमा विश्वासको प्रस्ताव राखिने उनले बताएका छन्।
पोर्चुगलको कम्युनिस्ट पार्टी (PCP) ले अविश्वास प्रस्ताव दर्ता गर्ने घोषणा गरेको छ। यदि संसद भंग गर्ने स्थिति आयो भने राष्ट्रपति मार्सेलो रेबेलो दी सौसाले तेस्रो पटक संसद भंग गर्नुपर्ने अवस्था आउन सक्छ ।
FOUNDER/CHIEF EDITOR :
