युरोपनेपाली खबर ।
संयुक्त राज्य अमेरिका ले भेनेजुएला का राष्ट्रपति निकोलस मादुरो र उनकी पत्नीलाई नियन्त्रणमा लिएको दाबी अमेरिकी राष्ट्रपति डोनाल्ड ट्रम्प ले गरेका छन्। ट्रम्पले सामाजिक सञ्जाल ‘ट्रुथ सोशल’ मा पोस्ट गर्दै मादुरो दम्पतीलाई विशेष अपरेशनपछि नियन्त्रणमा लिएर देश बाहिर लगिएको दाबी गरेका हुन्।
ट्रम्पका अनुसार अमेरिकी अपरेशन सफलतापूर्वक सम्पन्न भएको र त्यस क्रममा मादुरो र उनकी पत्नीलाई “कब्जा गरी देशबाट बाहिर निकालिएको” हो। यद्यपि, यस विषयमा अमेरिकी प्रशासन वा अन्य आधिकारिक निकायबाट थप विवरण सार्वजनिक गरिएको छैन भने मादुरो दम्पतीको अवस्थाबारे स्वतन्त्र पुष्टि पनि भइसकेको छैन।
यसैबीच, राष्ट्रपति ट्रम्पले भेनेजुएलामा अमेरिकाले ठूलो स्तरको सैन्य आक्रमण गरेको दाबी पनि गरेका छन्। भेनेजुएलाको राजधानी काराकाससहित विभिन्न प्रमुख सैन्य स्थलमा विस्फोटका आवाज सुनिएको र आकाशमा धुवाँ उडेको प्रत्यक्षदर्शीहरूले बताएका छन्। सामाजिक सञ्जालमा सार्वजनिक भएका तस्बिर र भिडियोहरूमा काराकास आसपासका क्षेत्रमा विस्फोटपछि धुवाँ फैलिएको देखिन्छ।
मादुरो नेतृत्वको भेनेजुएला सरकारले भने अमेरिकाको कदमलाई “सिधा सैन्य आक्रमण” को संज्ञा दिँदै कडा शब्दमा निन्दा गरेको छ। सरकारद्वारा जारी विज्ञप्तिमा राष्ट्रिय सार्वभौमिकतामाथि आक्रमण भएको दाबी गर्दै देशभर राष्ट्रिय आपतकाल घोषणा गरिएको जनाइएको छ। साथै, सुरक्षा निकाय र सेनालाई उच्च सतर्कतामा राखिएको छ।
अमेरिका–भेनेजुएला सम्बन्ध पछिल्लो समय निकै तनावपूर्ण बन्दै आएको सन्दर्भमा ट्रम्पको यो दाबी र सैन्य गतिविधिले क्षेत्रीय तथा अन्तर्राष्ट्रिय कूटनीतिमा गम्भीर असर पार्ने संकेत देखिएको छ। मादुरो दम्पती वास्तवमै अमेरिकी नियन्त्रणमा छन् वा छैनन् भन्ने विषयमा आधिकारिक पुष्टि नआएसम्म घटनाक्रमबारे विश्व समुदायले चासोपूर्वक निगरानी गरिरहेको छ।
आक्रमण तीब्र
संयुक्त राज्य अमेरिका ले भेनेजुएला भित्रका विभिन्न लक्ष्यमा सैन्य आक्रमण सुरु गरेको अमेरिकी अधिकारीहरूलाई उद्धृत गर्दै सीबीएस न्युज ले जनाएको छ। स्रोतहरूका अनुसार अमेरिकी राष्ट्रपति डोनाल्ड ट्रम्प ले भेनेजुएलाका सैन्य संरचना तथा अन्य रणनीतिक स्थलहरूमा आक्रमणको आदेश दिएका हुन्। यो कदमसँगै ट्रम्प प्रशासनले भेनेजुएलाका राष्ट्रपति निकोलस मदुरो को शासनविरुद्धको दबाब अभियान थप तीव्र बनाएको छ।
यी आक्रमणहरू क्यारिबियन क्षेत्रमा महिनौँदेखि जारी अमेरिकी सैन्य तयारीपछि भएका हुन्। यस क्रममा अमेरिकी नौसेनाको शक्तिशाली विमानवाहक युद्धपोत यूएसएस जेराल्ड आर. फोर्ड सहित दर्जनौँ युद्धपोतहरू भेनेजुएलाको आसपास तैनाथ गरिएको थियो। प्रशासनका अनुसार यस क्षेत्रीय सैन्य उपस्थितिले पछिल्ला कारबाहीका लागि आधार तयार पारेको हो।
पछिल्ला हप्ताहरूमा अमेरिकाले भेनेजुएलाको नजिक दुई वटा तेल ट्याङ्कर नियन्त्रणमा लिएको, लागूऔषध बोकेको दाबी गरिएका ३० भन्दा बढी डुङ्गामाथि घातक आक्रमण गरेको र राष्ट्रपति ट्रम्पले “लागूऔषध बोकेका डुङ्गा लोड गरिने बन्दरगाह क्षेत्र” भन्दै उल्लेख गरेको स्थानमा समेत प्रहार गरेको बताइएको छ। यी कारबाहीलाई ट्रम्प प्रशासनले लागूऔषध तस्करीविरुद्धको अभियानको हिस्सा भनेको छ।
अमेरिकी प्रशासनले राष्ट्रपति मदुरोमाथि लागूऔषध तस्करीमा संलग्न रहेको तथा आतंकवादी संगठनको सूचीमा रहेका गिरोहहरूसँग सहकार्य गरेको आरोप लगाउँदै आएको छ। मदुरो सरकारले भने यी सबै आरोप अस्वीकार गर्दै आएको छ। क्रिसमसको पूर्वसन्ध्यामा राष्ट्रपति ट्रम्पले आफ्नो अन्तिम लक्ष्य स्पष्ट नपारे पनि मदुरोप्रति कडा चेतावनी दिँदै “यदि उनले कडा खेल खेले भने, त्यो उनको अन्तिम पटक हुनेछ” भनेका थिए।
यसैबीच, राष्ट्रपति मदुरोले यस साता लागूऔषध तस्करी, तेल र आप्रवासनका विषयमा अमेरिकासँग वार्ता गर्न आफू तयार रहेको बताएका छन्। “जहाँ चाहन्छन्, जब चाहन्छन् र जसरी चाहन्छन्, ती विषयमा छलफल गर्न हामी खुला छौँ,” मदुरोको भनाइ उद्धृत गरिएको छ।
अमेरिकाको पछिल्लो सैन्य कारबाहीले अमेरिका–भेनेजुएला सम्बन्धलाई थप तनावपूर्ण बनाएको छ। क्षेत्रीय सुरक्षादेखि ऊर्जा आपूर्ति र कूटनीतिक सन्तुलनसम्म यसको प्रभाव कस्तो पर्छ भन्ने विषयमा अन्तर्राष्ट्रिय समुदायको चासो बढ्दै गएको छ।
FOUNDER/CHIEF EDITOR :
