पोर्चुगलका राष्ट्रपतिसंग नेपाल लगायत विभिन्न देशका आप्रवासी प्रतिनिधिको भेटवार्ता, स्मारिका हस्तान्तरण

पोर्चुगलका राष्ट्रपतिसंग नेपाल लगायत विभिन्न देशका आप्रवासी प्रतिनिधिको भेटवार्ता, स्मारिका हस्तान्तरण
प्रतिनिधि मण्डलका सदस्य एवं एनआरएनए आइसीसी सदस्य राजकुमार थापा स्मारिका हस्तान्तरण गर्दै
www.europenepalikhabar.com २०८१ असार ३१ गते सोमबार, 15-07-2024


युरोपनेपाली खबर, लिस्बन ।  गणतन्त्र पोर्चुगलका राष्ट्रपति मार्सेलो रेबेलो दि सौसासंग आज उहाँकै निवास बेलेम प्यालेस लिस्बनमा नेपाल लगायत विभिन्न देशका आप्रवासी प्रतिनिधिहरुले आइतबार भेटवार्ता गरेका छन् ।

केही महिना अघि पोर्चुगल सरकारले परिवर्तन गरेको आप्रवासी सम्बन्धी कडा नीतिनियम र प्रक्रियाहरुले उत्पन्न समस्या र परेको कठिनाइका बारेमा राष्ट्रपति मार्सेलोसंग आप्रवासी प्रतिनिधिहरुले आफ्नो समस्या र गुनासो राखेका थिए ।

पोर्चुगलको नेपाली समुदायको प्रतिनिधित्व गर्दै राष्ट्रपति निवास बेलेम पुगेका एआरएनए आइसीसी सदस्य राजकुमार थापाले आफ्नो समुदायको सवाल र चासोहरु राष्ट्रपतिलाई अवगत गराएका थिए । नेपाल पत्रकार महासंघ युरोपका उपाध्यक्ष समेत रहेका थापाले, "पोर्चुगलमा रहेका नेपालीहरुको रेजिडेन्सी कार्ड बन्ने प्रक्रियामा भएको कठिनाइ, पारिवारिक पुनर्मिलनका लागि भोग्नु परेको समस्या र ढिलाइ, काम गर्ने स्थान र कम्पनीमा हुने अनेकौं असमानता, विभिन्न कानुनी र कागजातहरु बनाउन परेको कठिनाइका बारेमा आफुले राष्ट्रपतिलाई जानकारी गराउँदै समस्या समाधानमा पहल गरिदिन" आग्रह गरेको  र राष्ट्रपतिले आफुले राखेको कुराहरु ध्यानपूर्वक सुनेर जिज्ञासाको जवाफ समेत दिएको" थापाले बताए ।

 उक्त अवसरमा थापाले आफैं सम्पादक रहेको, गैरआवासीय नेपाली संघ पोर्चुगलले प्रकाशित गरेको तर सार्वजनिक गरिनसकेको "नेपाल-पोर्चुगल दर्पण स्मारिका-२०२४" पहिलो प्रति पुस्तक राष्ट्रपतिलाई हस्तान्तरण गरेका थिए । उक्त पुस्तकमा राष्ट्रपतिले हस्ताक्षर गर्दा नेपाल पोर्चुगलको साँस्कृतिक, सामाजिक सम्बन्धका बारेमा राम्रो स्मारिका निकालेकोमा धन्यवाद दिंदै राष्ट्रपतिले आफुलाई नेपाली खाना समेत असाध्यै मनपर्ने बताउनु भएको, थापाले जानकारी दिए ।

आप्रवासीका लागि एक्यवद्धता एसोसिएसनका अध्यक्ष टिमोटियो म्यासेडोको नेतृत्वमा आप्रवासी सोलिडारिटी, ओल्हो भिभो, नेपाल, केप भर्डे, गिनी, बंगलादेश र ब्राजिलका आप्रवासीहरूका प्रतिनिधिहरु संलग्न सात सदस्यीय प्रतिनिधि मण्डलले पोर्चुगलमा सक्रिय ५१ वटा आप्रवासी संघ-संस्थाका प्रतिनिधिहरुले हस्ताक्षर गरेको ज्ञापन पत्र समेत राष्ट्रपति मार्सेलो समक्ष बुझाएको थियो ।

FOUNDER/CHIEF EDITOR :

RAJ KUMAR THAPA

EUROPE : LISBON, PORTUGAL
: europenepali2020@gmail.com
NEPAL : BANESHWOR, KATHMANDU

Video :

Everest Gautam

Technical Support

Bharat Poudel
© २०१६-२०२० europenepalikhabar.com सर्वाधिकार सुरक्षित