लण्डनबाट चोरी भएको कार कराँचीबाट बरामद, तर यो कार त्यहाँ कसरी पुग्यो ?

पाकिस्तानको सबैभन्दा ठूलो सहर कराँचीमा जानुभयो भने सडकमा सबै किसिमका सवारीसाधन गुडिरहेको देख्न पाइन्छ, तर पछिल्लो केही दिनदेखि सामाजिक सञ्जालमा चर्चा भइरहेको एउटा गाडीको कथा निकै अनौठो छ ।

गत महिनाको ३० तारिखमा विदेशी गुप्तचर निकायको सूचनामा भन्सार अधिकारीले कराँचीको डीएचए इलाकाबाट यो गाडीको खोजी गरिरहेका थिए ।

यस सम्बन्धमा भन्सारमा दर्ता भएको एफआइआर अनुसार उनीहरुले उक्त गाडी कथित रुपमा लण्डनबाट चोरी गरेर पाकिस्तान ल्याएको जानकारी पाएका थिए ।

यो कुनै साधारण कार होइन, बेन्टले मुल्सेन वीटी अटोमेटिक कार हो। भन्सारका अनुसार अहिले यसको मूल्य ३० करोडभन्दा बढी रहेको अनुमान गरिएको छ ।

लामो समयदेखि यो गाडीको गुप्तचर अनुगमन भइरहेको थियो तर भदौ अगस्ट ३० मा गाडी पार्किङ गरेको घरमा छापा मार्दा चाँदीको रङको कपडाले छोपिएको थियो । कपडा हटाएपछि त्यसमा स्थानीय नम्बर प्लेट पनि रहेको पाइयो ।

एफआईआरका अनुसार, यो गाडीको चेसिस नम्बरद्वारा पहिचान गरिएको थियो र गुप्तचर जानकारीमा दिइएको नम्बरसँग मेल खाएपछि यसलाई नियन्त्रणमा लिइएको थियो।

यो कार चोरेको आरोपमा भन्सारले दुई जनालाई पक्राउ गरेको छ । एफआईआरका अनुसार कराचीमा कारका मालिकले नोभेम्बर २०२२ सम्ममा यसका लागि सबै कानुनी कागजातहरू पूरा गर्ने शर्तमा कार अरू कसैले उनलाई बेचेको दाबी गरेका छन्।

चाबी नहुँदा कारलाई क्यारियरको माध्यमले उठाइएको भन्सार अधिकारीले बताएका छन् ।

सायद यो सम्पूर्ण घटनाको सबैभन्दा अचम्मको कुरा यो हो कि कुनै कानूनी कागजात नभए पनि यो कार सिन्धमा दर्ता गरिएको थियो। एफआइआरमा त्यो कानून पनि उल्लेख गरिएको छ जसमा कुनै पनि कारको दर्ताको लागि विदेश र भन्सार मन्त्रालयको अनुमति बाहेक सबै शुल्क र करहरू भुक्तान गर्न आवश्यक छ।

मोटर दर्ता, अन्तःशुल्क र कर विभागको मिलेमतोमा यो सम्भव भएको एफआईआरमा उल्लेख छ ।

यो गाडीको छोटो भिडियो सामाजिक सञ्जालमा निकै भाइरल भइरहेको छ । यसबारे विभिन्न टिकाटिप्पणी पनि भइरहेका छन् । योसँगै बेलायतबाट पाकिस्तानसम्म यो गाडीको ढुवानीमा पनि प्रश्न उठिरहेको छ र यसमा नम्बर प्लेट कसरी आयो भन्ने पनि सोधिएको छ ।

यस सम्बन्धमा सही जानकारी अनुसन्धान पूरा भएपछि मात्र बाहिर आउने छ, तर बीबीसीले लन्डनबाट चोरी भएका गाडी पाकिस्तानसम्म कसरी पुग्यो भन्ने जान्न खोजेको छ ।

यस सम्बन्धमा पाक व्हील्सका सह-संस्थापक सुनिल मुञ्जले बीबीसीसँग कुरा गर्दै केही रोचक जानकारी दिएका छन् ।

उनी भन्छन्, ‘यो गिरोहले यसरी काम गर्छ कि जहाँबाट गाडी आउँछ, त्यहाँ पहिले चोरीको रिपोर्ट गरिँदैन, किनभने गाडी कुन देशबाट जाँदैछ र कुन देशमा गइरहेको छ दुवै देशमा गाडीको अवस्था हेरिन्छ । त्यसको कागजपत्र पूरा छ वा छैन र त्यो देशमा चोरी भएको गाडी हो कि हैन भन्ने पनि हेरिन्छ ।

यो कार साँच्चै चोरी भएको भए सिस्टममा रेकर्ड भएकाले बन्दरगाहमा नै जफत गर्न सकिने उनको विश्वास छ ।

सुनीलका अनुसार लण्डनबाट यहाँ (पाकिस्तानमा) सार्दा गाडी चोरी भएको कसैलाई थाहा थिएन । जब कार यहाँ पाकिस्तानमा क्लियर गरियो, चोरी लन्डनमा रिपोर्ट गरियो ताकि बीमा दाबी गर्न सकियोस्।

यो काम जुनसुकै गिरोहले गर्छ, सामान्यतया पहिले अर्को देशमा सवारीसाधन ट्रान्सफर गर्छ र त्यसपछि उक्त देशको बन्दरगाहमा गाडी क्लियर गरेपछि जुन देशबाट पठाइएको हो, त्यही देशमा चोरी भएको खबर गर्छ र त्यसपछि ती मालिकहरू खोज्न थाल्छन्,’ उनले भने ।

सुनिल मुन्जका अनुसार यो पहिलो घटना होइन, पाकिस्तानमा यस्ता धेरै गाडी दर्ता भइसकेका छन् । उनको दाबी छ, ‘सबैभन्दा अचम्मको कुरा त यो कार ननकस्टम नभई दूतावासका केही कागजका आधारमा क्लियर गरिएको हो । कूटनीतिज्ञहरूलाई ड्युटी फ्री कारको अनुमति दिइन्छ, उनीहरू बस्दासम्मको लागि ड्युटी फ्री कारलाई अनुमति दिइन्छ।”

यी गाडीबाट वास्तविक अपराधीसम्म पुग्न निकै कठिन हुने भएकाले सुरक्षाको अवस्था हेर्दा यो निकै खतरनाक कुरा भएको उनी बताउँछन् ।

भन्सार पक्षबाट पाकिस्तान हस्तान्तरण गर्दा यस गाडीको मूल्य ४ करोड १४ लाख रुपैयाँभन्दा बढी रहेको बताइएको छ भने हालको विनिमय दरअनुसार यसको मूल्य ५ करोड ८५ लाख रहेको बताइएको छ । यस रिपोर्टका अनुसार यस कारको शुल्क र करपछिको मूल्य ३० करोड ७४ लाख रुपैयाँभन्दा बढी छ ।