इतिहासमा यस्तो थियो पोर्चुगलको विशाल शक्ति र साम्राज्य, यसरी जन्मेको थियो अमेरिका

युनान र रोमन सभ्यताको विघटन भइसकेको थियो । रोमन साम्राज्यको विघटनपछि मध्य-युगीन युरोपको नक्सामा जर्मनीको उदय भयो । स्थापित इसाई क्याथोलिक चर्चको शक्तिले युरोपको जनमानसमा एकाधिकार जमाएको थियो । जर्मनी र चर्चको शक्तिले युरोपलाई सभ्यताको बाटोमा अग्रगति दिने कार्य गरिरहेको थियो । युरोपका पूर्वी सभ्यताहरूसँग स्थल-मार्गबाट सम्पर्क जोडिएको थियो । अनि त्यसै समयमा इस्लामको नवोदित शक्तिको झण्डामुनि अरबहरू र तत्पश्चात् तुर्कहरूले युरोपको ढोका ढकढक्याउन सुरु गरिसकेका थिए । 

अरबीहरूले उत्तरी अफ्रिकाहुँदै भूमध्यसागरको पारि पोर्चुगल र स्पेनको एउटा ठूलो भागमा अधिकार कायम गरे, अनि तुर्कहरूले पवित्र रोमन-साम्राज्यको पूर्वी भाग र इसाईहरूको पवित्र तीर्थस्थल जेरुसेलमलाई आफ्नो अधीनमा पारे । यसरी युरोपका लागि पूर्वी सभ्यताहरूसँग सम्पर्क गर्ने स्थल-मार्ग पूर्णतः तुर्कहरूको नियन्त्रणमा आइसकेकाले बन्द भयो ।