एनआरएनए पोर्चुगलद्वारा स्वर्गीय कासीराम बुढाथोकीका लागि संकलित सहयोग रकम हस्तान्तरण

एनआरएनए पोर्चुगलद्वारा स्वर्गीय कासीराम बुढाथोकीका लागि संकलित सहयोग रकम हस्तान्तरण
www.europenepalikhabar.com २०८२ साउन २२ गते बिहीबार, 07-08-2025


नवराज घर्ती, लिस्बन, पोर्तुगल – गैरआवासीय नेपाली संघ (एनआरएनए) पोर्तुगलले पोर्तुगलमा कार्यरत अवस्थामा असामयिक निधन भएका नेपाली नागरिक स्वर्गीय कासीराम बुढाथोकी (गोरे)का लागि संकलित  रकम हस्तान्तरण गरेको छ।

म्याग्दी जिल्लामा जन्मिएर स्थायी रूपमा रुपन्देही, बुटवल उपमहानगरपालिका–१५, सेम्लार रतनपुरमा बसोबास गर्नु भएका ४१ वर्षीय कासीराम बुढाथोकीको यही साउन १७ गते (अगस्ट १, २०२५) मा लिस्बनस्थित करी कब्राल अस्पतालमा निधन भएको हो। उहाँ हाल लिस्बनमा श्रमिकको रूपमा कार्यरत हुनुहुन्थ्यो।

उहाँको असामयिक निधनले सम्पूर्ण नेपाली समुदायलाई मर्माहित बनाएको छ। यो दुःखद घडीमा उत्पन्न भएको पारिवारिक तथा आर्थिक संकटलाई बुझ्दै, एनआरएनए पोर्तुगलले आपतकालीन राहत संकलन अभियान सञ्चालन गरेको थियो। अभियानमा संघका पदाधिकारी, सदस्यहरू, समाजसेवी तथा शुभेच्छुकहरूको सक्रिय सहयोग रहेको थियो।

संकलित राहत रकम मगर समाज पोर्तुगलका प्रतिनिधि विकास थापा मगरको बैंक खातामा आधिकारिक रूपमा हस्तान्तरण गरिएको एनआरएनए पोर्तुगलका अध्यक्ष बम बहादुर जीसीले जानकारी दिनुभयो।

उहाँले भन्नुभयो,“नेपाली समुदायमा जब यस्ता पीडादायी क्षणहरू आउँछन्, त्यति बेला संघ/संस्थाले आफ्नो तर्फबाट जिम्मेवारीका साथ भूमिका निर्वाह गर्नुपर्छ। एनआरएनए पोर्तुगलले यसपालि मानवीय जिम्मेवारी वहन गर्दै नेपाली समुदायसँगको ऐक्यबद्धता देखाएको छ। आगामी दिनमा पनि हामी दुःखमा परेका नेपालीहरूसँग सधैं साथमा रहनेछौं।”

अध्यक्ष जिसीले समाजसेवाको नाममा कुर्सीमा मात्र बसेर नभई फिल्डमा उत्रिएर काम गर्नुपर्ने आवश्यकता औंल्याउँदै थप्नुभयो, “यसपटकको एनआरएनए पोर्तुगलले सम्पूर्ण नेपालीहरूको प्रतिनिधित्व गर्दै अभिभावकको भूमिका निर्वाह गर्ने छ।”

एनआरएनए पोर्तुगलले यस दुःखद घडीमा सहयोग पुर्‍याउनु हुने सम्पूर्ण समुदायप्रति आभार व्यक्त गर्दै, यस्ता मानवीय कार्यहरूमा निरन्तर अग्रसर रहने प्रतिबद्धता पुनः दोहोर्‍याएको छ।


FOUNDER/CHIEF EDITOR :

RAJ KUMAR THAPA

EUROPE : LISBON, PORTUGAL
: europenepali2020@gmail.com
NEPAL : BANESHWOR, KATHMANDU

Video :

Everest Gautam

Technical Support

Bharat Poudel
© २०१६-२०२० europenepalikhabar.com सर्वाधिकार सुरक्षित