एनआरएनए पोर्चुगलको नवौं महाअधिवेशन सम्पन्न, आसिसी(केन्द्रीय सदस्य) मा थापा र बस्नेत, एनसिसी अध्यक्षमा खड्का

चक्र गुरूङ, लिस्बन ।

साधारणत: अधिवेशन नीति निर्माण र नेतृत्व छनौटका लागि हुने गर्दछ तर गैरआवासीय नेपाली संघ, पोर्चुगलको नवौं अधिवेशन भने नेतृत्व छनौटमा मात्रै सीमित हुँदै जुलाई ३० मा सम्पन्न भएको छ ।

नयाँ बन्ने समितिको पदीय आकांक्षीहरुको सङ्ख्या धेरै भएकोले सहमतिको प्रयासमा समय खर्चदा नीतिगत छलफल ओझेलमा परेको हो । अघिल्लो अधिवेशनमा निर्वाचन प्रकियामा असन्तुष्टी जनाउँदै बनेको समिति र मूल समितिबीचको एकता प्रक्रियाले पनि तयारीको लागि समय अभाव भएको थियो ।

२,२७८ जना पञ्जीकृत सदस्य रहेको पोर्चुगलको राष्ट्रिय समन्वय परिषदको अधिवेशन (२०२३-२०२५) बाट ४९ जनाको जम्बो कार्यसमिति र दुईजना आइसिसी सदस्यहरु निर्विरोध निर्वाचित भएका छन् । दुई वर्ष कार्यकाल रहेको समितिको अध्यक्ष पदका लागि एक/एक वर्ष विभाजन गरेर दुईजना अध्यक्ष बन्ने निर्णय भएको छ । पहिलो वर्ष उमेशकुमार खड्का र दोश्रो वर्ष दीपा काफ्ले अध्यक्ष बन्ने छन् । यसका लागि आवश्यक विधान र नियमावली पनि संशोधन गरेर अधिवेशनबाट पारित गरिसकेको छ ।

सहमति निर्माण गर्न सफल अध्यक्षद्वय अधिकारी र शेर्पा, महासचिव थापाको कुटनीतिक चातुर्यता

यसपटक विगतको भन्दा ठूलो कार्यसमिति बनेको छ । पदीय आकांक्षीहरु धेरै हुँदा समाजका अगुवाहरुलाई मिलाउन निकै कठिन परेको थियो । अघिल्लो कार्यकालमा भएको दुई समानान्तर समिति र गतिविधिले समाजमा नराम्रो सन्देश गएको थियो । यसबाट शिक्षा लिएका अध्यक्षद्वय रबीन अधिकारी र सोमफूरी शेर्पाले जसरी पनि निर्विरोध कार्यसमिति निर्माण गर्न चाहेका थिए । यस मामिलामा उनिहरु सफल पनि भए । अध्यक्षद्वयको अभियानमा महासचिव रहेका राजकुमार थापाले कुटनीतिक भूमिका निर्वाह गरेका थिए । यसका लागि संघका पूर्व अध्यक्षहरु पूर्ण हमाल, रमेश गुरुङ, लक्ष्मीप्रसाद सापकोटा र तिलक गैरेको पनि केही भूमिका रहेको थियो ।

निर्वाचन समितिले सहमतिकै लागि पटक-पटक निर्वाचन कार्यालिका संशोधन गरेका थिए । दुईजना आइसिसि सदस्य छानिनु पर्नेमा तिनजना राजकुमार थापा, विष्णु बस्नेत(बिनु), सज्जन हमाल र  बस्नेतले निवेदन दर्ता गरेका थिए । एकजना अध्यक्षका लागि तिनजना यामेन्द्रकुमार घर्ती, दीपा काफ्ले र उमेशकुमार खड्काले उम्मेद्वारी दर्ता गरेका थिए । सहमतिका लागि अन्य पदलाई गौण राखी यसैमा केन्द्रीत थियो । धेरै रस्साकसीपछि आइसिसी सदस्यबाट हमाल र अध्यक्षबाट घर्तीले उम्मेद्वारी फिर्ता लिएपछि सहमतिको बाटो खुल्यो । अन्ततः अन्य केही पदसङ्ख्या थप्दै अध्यक्षका लागि एक/एक वर्ष खड्का र काफ्लेले बाँड्ने सहमति भयो । खड्का र काफ्ले दुबैलाई इमान्दार र शालिन् व्यक्ति मानिन्छन् ।

नयाँ इतिहास बन्दै

एनआरएनए, पोर्चुगलको सन् २०२३-२०२५ को कार्यकालमा दीपा काफलेले दोश्रो वर्ष संघको नेतृत्व गर्ने निश्चित भएपछि नयाँ इतिहास बन्न लागेको छ । कार्यकाल सम्हालेपछि उनि पहिलो महिला अध्यक्ष हुनेछिन् । बाग्लुङ घर भएकी काफ्ले एक सफल व्यावसायी पनि हुन् । उनी अघिल्लो कार्यकालमा महिलातर्फ उपाध्यक्ष थिइन् ।

खड्काको संयमित कदम

संघको नवौं राष्ट्रिय महाधिवेशन सफल पार्न भूमिका खेल्नेमा अर्को मुख्य पात्र हुन्, प्रेम खड्का । उनी निर्वाचन समितिको संयोजक हुन् । भद्र र शालिन् स्वभावका खड्काले संयमित भएर निर्वाचनलाई नहाँकेको भए परिस्थिति भाँडिन सक्थ्यो ।उनैले सामजिक सञ्जालमार्फत सहमतिमा नयाँ समिति निर्माण गर्न आव्हान गरे । आकांक्षीहरुलाई बोलाएर सहमतिको प्रयास पनि गरे । सहमतिका लागि पटक-पटक निर्वाचन कार्यतालिका संसोधन नै गरे । र, अधिेवेशनसँगै निर्विरोध नयाँ समिति गठन गर्न सफल भए ।

विभिन्न प्रतिवेदनहरु बन्द शत्रबाट पारित

ढिलोगरी शुरु भएको बन्द शत्रमा संघको तर्फबाट महासचिव राजकुमार थापाले संस्थागत प्रतिवेदन, शान्ति अर्यालले आर्थिक प्रतिवेदन र जयभद्र सापकोटाले विधान संसोधनको प्रस्ताव प्रस्तुत गरेका थिए । बन्द शत्रमा प्रस्तुत गरेको सबै प्रतिवेदन सबै मौखिक थिए । सबै प्रतिवेदनहरु बन्द शत्रले पारित गरेको थियो ।