युरोपनेपाली खबर ।
By-राजकुमार थापा,खाँदबारी ।
संखुवासभा । आगामी मंसीर ४ गते हुने गइरहेको संघीय संसद प्रतिनिधिसभाको निर्वाचनको मिति सम्मुख आएसंगै संखुवासभामा नेकपा एमाले र गठबन्धनका उम्मेदवारबीच निक्कै कडा, उच्च र तीब्र प्रतिस्पर्धा हुने देखिएको छ । चुनावी लहर र मतदाताको आकर्षण भने अघिल्लो चुनावमा जस्तो उत्साहजनक नपाइए पनि चुनावी सरगर्मी भने ह्वात्तै बढेको हाम्रो सर्वे रिपोर्टले देखाएको छ ।
स्पष्ट हुनेगरी कसैको पक्षमा पनि चुनावी लहर नदेखिएकोले नतिजा के होला भन्ने अनुमान गर्न कठिन भएको छ । यसपटक गठबन्धनका विरुद्ध एमाले एक्लै मैदानमा उत्रिएको छ । २०७४ को निर्वाचनमा भने अहिले कै मुख्य प्रतिस्पर्धी राजेन्द्र गौतमले दीपक खड्कालाई एक हजार एक सय मत भन्दा बढीको अन्तरले हराएका थिए । त्यो निर्वाचनमा एमाले विजयी र काँग्रेस दोस्रो बनेको थियो । गत स्थानीय निर्वाचनमा वडा अध्यक्षको मत हेर्दा समग्र संखुवासभामा एमाले केही हजार मतले अघि रहेको देखिन्छ ।
प्रदेश नम्बर १ को रणनीतिक महत्त्वको पहाडी/हिमाली जिल्ला संखुवासभाको एक सीट रहेको प्रतिनिधसभा सदस्य पदमा युरोपनेपाली खवर र हाम्रो टीमले गरेको चुनावी मत सर्वेक्षणले विभिन्न रोचक र अनौठा तथ्यहरुलाई उजागर गरेको छ । मुख्य गरी प्रतिनिधि सभा सदस्यको निर्वाचनमा एमालेका राजेन्द्र गौतम र गठबन्धनको तर्फबाट काँग्रेसका दीपक खड्का बीच नै कडा टक्कर हुने देखिन्छ ।
संखुवासभामा जम्मा मतदाता संख्या १,१७,५५४ जना रहेका छन्, जसमा महिला मतदाता संख्या ५६,६९० र पुरुष मतदाता संख्या ६०,८६४ रहेको छ । निर्वाचनको लागि यस जिल्लामा मतदान स्थलको संख्या १०८ र मतदान केन्द्रको संख्या १६२ रहेको छ ।
प्रतिनिधि सभाका लागि विभिन्न दलका १० र स्वतन्त्र २ गरी जम्मा १२ जना उम्मेदवारहरु रहेका छन् ।
कहाँ को कति बलियो ?
१. खाँदबारी नगरपालिका
संखुवासभाको मुख्य व्यापारिक केन्द्र र ठूलो शहर सदरमुकाम खाँदबारीमा अहिले चुनावी पारो बढेको छ । एमालेविरुद्ध काँग्रेस, माओवादी केन्द्र र नेकपा एसले लगायतका दलहरुले चुनावी गठबन्धन गर्ने निर्णय भएसँगै जिल्लामा सम्भावित परिणामको आंकलनले माहोल तातेको हो । । खाँदबारीमा एमाले एक्यवद्ध भएर चुनावी मैदानमा होमिएको देखिएको छ भने गठबन्धनका नेता कार्यकर्तामा खासै उत्साहको अवस्था पाइएको देखिएन, बरु उम्मेदवारी चयनदेखि नै असन्तुष्टिहरु छरपस्ट भैरहेको र नसमालिएको देखिएको छ । गत स्थानीय निर्वाचनमा खाँदबारी नगरपालिकाको प्रमुखमा काँग्रेस र उपप्रमुखमा एमालेका उम्मेदवार विजयी बनेका थिए । घरदैलो कार्यक्रममा दुवै शक्तिले आफुहरुको पक्षमा जनलहर आएकोले दावी गरेपनि यथार्थमा कुनै पक्षमा पनि त्यस्तो एकलौटी जनलहर आएको देखिएन । खाँदबारी नगरपालिकामा गौतम र खड्काको बराबर जस्तो मत आउने सर्वेक्षणका तथ्यहरुले इंकित गरेको छ ।
नयाँ थपिएका मतदाता र युवाहरुमा भने पुराना ठूला पार्टीहरु भन्दा नयाँ र स्वतन्त्र प्रति झुकाव रहेको पाइयो । जे होस् खाँदबारी कडा टक्करका बीच एकदुई सय मतले गौतम र खड्का कसले उछिन्न यसै भन्न सकिदैन ।
२. चैनपुर नगरपालिका
जिल्ला कै दोश्रो ठूलो व्यापारिक केन्द्र र पूर्व कै पुरानो शहर चैनपुरमा भने चुनावी रौनक अलि बढी देखियो । एमाले उम्मेदवार राजेन्द्र गौतमको गृह नगरपालिका भएर पनि हुन सक्छ, चुनाव अलि तातेको पाइयो । बैशाखमा सम्पन्न स्थानीय तह निर्वाचनको मत परिणाम अनुसार चैनपुर नगरपालिकाको प्रमुख, उपप्रमुख लगायत अधिकांस वडामा नेकपा एमालेका उम्मेदवारहरु विजयी भएका थिए ।
पाँच दलीय गठबन्धन हुँदा पनि प्रतिद्धन्दी नेपाली काँग्रेस लगायतका दलहरुले एमालेसंग फराकिलो मतान्तरमा यस पालिकामा हार व्यहोर्नु परेको थियो । आफ्नै गृह नगरको व्यक्ति उठेको अनुभवी र क्षमतावान भएको भन्दै चैनपुर नगरपालिकाका धेरै मतदाताहरुले एमालेका राजेन्द्र गौतमलाई रोजे । त्यसपछि स्वाभाविक रूपमा गठबन्धनका दीपक खड्का भने । यस नगरमा एमालेका गौतमले गठबन्धनका खड्कालाई फराकिलो मतान्तरले उच्छिन्ने सर्वेक्षणका तथ्यहरुले देखाएको छ।
३. मादी नगरपालिका
मादी नगरपालिका एमालेको सबैभन्दा मजबुत गढ देखिएको छ । यहाँ गठबन्धनका खड्काभन्दा एमालेका गौतम निक्कै अघि देखिएको छन् । गत स्थानीय तह निर्वाचनमा मादी नगरपालिकामा एमालेले प्रमुख उपप्रमुख सहित अधिकास वडामा विजय हासिल गरेको थियो । यहाँ एमालेका गौतमले गठबन्धनका खड्कालाई बलियो मतान्तरले लीड गर्ने सम्भावना छ ।
४. धर्मदेवी नगरपालिका
धर्मदेवी नगरपालिकामा भने गठबन्धनका दीपक खड्का केही मजबुत देखिएका छन् । यो उनको गृहनगर पनि हो । गत स्थानीय तह निर्वाचनमा प्रमुख एमालेले जितेको थियो भने उपप्रमुख सहित बहुमत वडा काँग्रेसले जितेको थियो । यहाँ काँग्रेस गठबन्धनका खड्काले कति मतले उछिन्छन् त्यसले चुनावी परिणामको गणितमा निर्णायक फेरबदल पार्न सक्ने आंकलन गरिएको छ ।
५. पाँचखपन नगरपालिका
पाँचखपन नगरपालिका एमालेका गौतम र गठबन्धनका खड्का बीच हाराहारी बराबरी मत आउने सर्वेक्षणले देखाएको छ । गत स्थानीय निर्वाचनमा यहाँ गठबन्धनले प्रमुख जितेको छ । पाँचखपनमा नयाँ थपिएका मतदातामा भने अनुभवी एमालेका गौतमप्रति आकर्षण देखियो ।
६. सभापोखरी गाउँपालिका
सभापोखरी गाउँपालिकामासमेत गठबन्धन र एमालेका उम्मेदवार बीच नै कडा प्रतिस्पर्धा हुने देखिएको छ । गत स्थानीय निर्वाचनमा गठबन्धन र एमाले उम्मेदवार बीच यस पालिकामा मुख्य प्रतिस्पर्धा भएको थियो । यो आम निर्वाचनमा यस पालिकाका नयाँ मतदाताले भने एमालेमा उम्मेदवारप्रति अलि बढी सहानुभूति देखिएको पाइएको छ ।
७. भोटखोला गाउँपालिका
भोटखोला गाउँपालिकामा स्पष्ट रूपमा एमालेका गौतम अगाडि देखिएका छन् । यहाँ गठबन्धनका खड्कापछि परेको देखिन्छ । गत स्थानीय निर्वाचनमा यस पालिकामा एमालेले प्रमुख र उपप्रमुख जितेको थियो । गठबन्धन भित्रको तीब्र असन्तुष्टि हेर्दा भोटखोला गाउँपालिकामा एमालेभन्दा गठबन्धन पछाडि पर्ने निश्चित जस्तै देखिएको छ ।
८. मकालु गाउँपालिका
मकालु गाउँपालिकामा गठबन्धनका खड्का र एमालेका गौतम बीच कडा टक्कर हुने सर्वेक्षणबाट देखिएको छ । यहाँ विभिन्न खालक रोचक तथ्य र विवरणहरु देखिएका छन् । हामी अर्को विवरणमा यी कारणहरु प्रकाशित गर्नेछौं । गत स्थानीय निर्वाचनमा यस पालिकामा काँग्रेसले प्रमुख जितेको थियो ।
९. शिलिचोङ गाउँपालिका
शिलिचोङ गाउँपालिकामा गठबन्धनका खड्का र एमालेका गौतम बीच नै प्रतिस्पर्धा हुने देखिएको छ । तर यहाँ केही मत भने जसपा र मंगोल नेसनल अर्गनाइजेसनले पनि ल्याउने देखिएको छ । गत स्थानीय निर्वाचनमा यस पालिकामा काँग्रेसले प्रमुख र उपप्रमुख दुवै जितेको थियो । समग्रमा शिलिचोङमा गठबन्धनका खड्का र एमालेका गौतम बीच झिनो मतले जसले उछिनपाछिन हुने सर्वेक्षणले देखाएको छ ।
१०. चिचिला गाउँपालिका
चिचिला गाउँपालिकामा अहिले पनि गठबन्धन र एमालेका उम्मेदवार बीच नै प्रतिस्पर्धा देखिएको छ । गत स्थानीय निर्वाचनमा यस पालिकामा काँग्रेसका उम्मेदवार विजयी भएका थिए । यहाँ पनि बराबरी, हाराहारी मत आंकलनमा गठबन्धनका खड्का र एमाले गौतमको उस्तै उस्तै मत आउने हो कि जस्तो देखिएका छ ।
संखुवासभा जिल्लाभरका पालिकामा ७६ वडाहरुमा रहेका छन् । गत स्थानीय निर्वाचनमा एमालेले सबै वडामा आफ्ना उम्मेदवार खडा गरेको थियो भने गठबन्धनमा ६० वटा वडा मात्र भागवण्डा भएको थियो । जसमा काँग्रेसलाई ४६ वडा, माओवादी ६ वडा र एकिकृत समाजवादीलाई ५ र ३ वटा वडा जनता समाजवादी पार्टीका उम्मेदवार उठेका थिए ।
निष्कर्ष : समग्रमा निर्वाचन हुन ३ दिनमात्र बाँकी हुँदा मत सर्वेक्षणले संखुवासभाको संघीय संसद प्रतिनिधिसभाको सीटमा कडा टक्कर हुने देखिएको छ । सर्वेक्षणको बेलाको अग्रता कायम रहे एमालेका राजेन्द्र गौतमले संघीय संसद प्रतिनिधि सभामा दोश्रो पटकमा लागि आफ्नो सीट सुरक्षित गर्नेछन् । चुनाव सुरु हुने अन्तिम ७२ घण्टामा कुनै नाटकीय परिवर्तन वा खेल भएन भने लगभग ५ देखि ६ सय मतको अन्तरले एमालेका गौतमले गठबन्धनका खड्कालाई पराजित गर्ने छन् ।
नोट : चुनावी सर्वेक्षणको अन्तर्राष्ट्रिय मापदण्ड अनुसार १-३ प्रतिशत डाटाहरुको इरर वा घटबढलाई उचित नै मानिन्छ अर्थात अनुचित मानिदैन ।
(चुनावी विश्लेषक राजकुमार थापा खाँदबारी नगरपालिका वडा नम्बर १०, चन्दनपुरका स्थायी बासिन्दा हुन् ।
FOUNDER/CHIEF EDITOR :
