पोर्चुगलको प्रमुख प्रतिपक्षी दल सोसलिस्ट पार्टीका सांसदहरु संग नेपाली सहितको प्रतिनिधि मण्डलद्वारा भेटवार्ता

युरोपनेपाली खबर, लिस्बन । गत मार्चसम्म सत्तारुढ भएर लगातार ९ बर्ष शासन गरेको र अहिले प्रमुख प्रतिपक्षी पोर्चुगलको सबैभन्दा ठूलो दल सोसलिस्ट पार्टी Partido Socialista का संसदीय समुहका ४ जना सांसदहरु संग नेपाली सहितको प्रतिनिधि मण्डलले सोमबार पोर्चुगलको संसद भवनमा भेटवार्ता गरेका छन् । 

एनआरएनए आइसीसी सदस्य राजकुमार थापा सहितको प्रतिनिधि मण्डलको संयोजन Solidariedade Imigrante  का अध्यक्ष Timóteo Macedo  ले गरेका थिए ।  नेपाल, ब्राजिल, वंगलादेश लगायत छ देशका आप्रवासी संस्थाका प्रतिनिधिहरु सहितको टोलीले झन्डै तीन घण्टा सांसदहरु संग छलफल गरेको थियो ।

नेपाली समुदायको प्रतिनिधित्व गर्दै संसद भवन पुगेका एनआरएनए आइसीसी सदस्य राजकुमार थापाले पोर्चुगलको नेपाली समुदायको हकहित, चासो र समस्याका बारेमा अवगत गराउँदै समाधानको लागि पहल गरिदिन आग्रह गरेको र सोसलिस्ट पार्टीका सांसदहरुबाट सकारात्मक प्रतिक्रिया पाएको थापाले बताए ।