युरोपनेपाली खबर ।
पोर्चुगल । थारु फिल्मका निर्देशक तथा अभिनेता परशुराम चौधरीको मार्च ३ तारिख शुक्रबार पोर्चुगलमा निधन भएको छ । उपचारको क्रममा ४५ वर्षिय चौधरीको निधन यहाँको एक अस्पतालमा भएको हो ।
अस्पतालले उनको मृत्युमा हृदयघातको संकेत देखिएको जनाएको छ । उनलाई दुई महिनाअघि अस्पताल भर्ना गरिएको थियो । उनी झन्डै ९ महिना अघि एक सडक दुर्घटनामा समेत घाइते भएका थिए । उनी लामो समयदेखि निरन्तर उपचारको क्रममा थिए ।
पोर्चुगलमा मार्च ३ तारिख शुक्रबार ४५ बर्षिय चौधरी र बराल थरका ७६ बर्षिय अर्का एक बृद्ध समेत गरी एकैदिन दुई जना नेपालीको मृत्युु भएको आफुहरुले जानकारी पाएको एनआरएनए पोर्चुगलका महासचिव राजकुमार थापाले बताए । एनआरएनए पोर्चुगल लगायत सिङ्गो नेपाली समुदायको तर्फबाट मृतकहरुप्रति भावपुर्ण श्रद्धाञ्जली अर्पण गर्दै शोक सन्तप्त परिवारजनमा समवेदना व्यक्त गरिएको महासचिव थापाले जनाए ।
चौधरीले कमैया नामक डकुमेन्ट्रीमा प्रमुख पात्रको भूमिका निर्वाह गरेका थिए । चौधरीकै अभिनय तथा लगानीमा निर्माण भएको थारु फिल्म बौछार, जीवन एक लदिया हो लगायत हिट भएका थिए ।
कराँतेका अन्तर्राष्ट्रिय खेलाडी समेत रहेका चौधरी थारु फिल्मको निर्माण तथा अभिनयबाट चर्चामा आएका थिए ।
उनी कैलाली जिल्ला, धनगढी उपमहानगरपालिका-१, शिवनगरका बासिन्दा हुन् । उनी सन् २०१५ देखि पोर्चुगलमा बस्दै आएका थिए । चौधरीका पत्नी र तीन छोरीहरु रहेका छन् ।
FOUNDER/CHIEF EDITOR :
