युरोपनेपाली खबर, लिस्बन, पोर्चुगल । पोर्चुगलको राजधानी लिस्बनमा लामो समयदेखि सडकमा बसोबास गर्दै आएका एक नेपाली नागरिकलाई गैरआवासीय नेपाली संघ (एनआरएनए) पोर्चुगलको पहलमा उद्दार गरी नेपाल फर्काइएको छ ।
झापा जिल्लाका स्थायी बासिन्दा कट्टेल केही वर्षअघि रोजगारीका लागि पोर्चुगल पुगेका आएका थिए । तर, विभिन्न व्यक्तिगत र सामाजिक कारणले गर्दा उनी पोर्चुगलमा बसोबास र जीविकोपार्जन गर्न असमर्थ हुँदै सडक जीवन बिताउन बाध्य भएका थिए ।
उनको अवस्था गम्भीर रहेको जानकारी पाएपछि एनआरएनए पोर्चुगलले तुरुन्तै पहल गर्दै परिवारसँग समन्वय गरी उद्धार प्रक्रिया अघि बढाएको हो । संघले आवास, खानपान, लत्ताकपडा तथा अन्य आवश्यक सामग्रीको व्यवस्था गर्नुका साथै कागजात तयारी र विमान टिकटको समेत व्यवस्था गरी स्वदेश पठाइएको एनआरएनए पोर्चुगलका अध्यक्ष बम बहादुर जि.सी. ले बताए । 
उद्धार कार्यमा एनआरएनएसँगै लिस्बनस्थित स्थानीय नेपाली व्यवसायी र समुदायको उल्लेखनीय सहयोग रहेको बताइएको छ ।
एनआरएनए पोर्चुगलले यस्ता कठिन परिस्थितिमा परेका नेपालीहरूको सहयोगका लागि आफू सधैं प्रतिवद्ध रहेको जनाएको छ। संघका अध्यक्ष बम बहादुर जि.सी. र महासचिव गुरूपेमा तामाङले एक विज्ञप्ति जारी गर्दै उद्धारमा संलग्न सबै सहयोगीहरूलाई धन्यवाद व्यक्त गरेका छन् ।
FOUNDER/CHIEF EDITOR :
