काठमाडौ । गजुरेल थर भएका एकजना व्यक्ति दुई दिनअघि सामाजिक सञ्जालमा एउटा ‘स्टाटस पोस्ट’ गरे । ट्विटरमा उनले लेखेका छन्, ‘वर्किङ भिसामा पोर्चुगल जान इच्छुक कोही हुनुहुन्छ भने ९८४८५..४७२ मा वाट्सएप गर्नुहोला । लागत महँगो छ ।’
यो स्टाटस देखिसकेपछि धेरैलाई शंका लाग्नु स्वाभाविक हो । पछिल्लो समय युरोपेली मुलुकमा आकर्षक रोजगारीमा पठाइदिने भन्दै रकम उठाउने र बिचौलिया सम्पर्कविहीन हुने गरेका खबरहरु बाहिरिएकाले आशंका लाग्नु स्वाभाविक पनि हो ।
सामाजिक सञ्जालमार्फत विज्ञापन गरेर ठग्ने क्रम बढेपछि काजी नामका सामाजिक सञ्जालकर्ता पनि शंकाको घेरामा तानिएका छन् । वैदेशिक रोजगार विभागले पनि बेलाबखत यस्ता विज्ञापनको पछाडि नलाग्न सूचित गराउँदै आएको छ । विदेशमा राम्रो कमाइ हुने आश्वासन देखाएर गिरोहले ठगी गर्दै आएको बताइन्छ ।
तर कुनै पनि व्यक्तिको माध्यमबाट विदेश जाने कार्य असुरक्षित र अवैध रहेको विभागको भनाइ छ । नेपाली दलालहरुले युवायुवतीलाई एउटा कामको लागि भनेर अर्कै काममा लगाई बिल्लीबाठ बनाएका घटना पनि थुप्रै छन् । विकसित मुलुकमा लैजाने भन्दै दलालले धेरैलाई ठगेर घरको न घाटको बनाइदिएका छन् ।
उक्त नम्बरमा सम्पर्कमा आएका ... गजुरेलले आफन्तहरु मिलेर बाहिर जान लागेको स्वीकारे । पोर्चुगलमा रहेका एक जना आफन्तले ४५ जनाको भीसा पठाइदिएको उनको भनाइ छ । भीसा बराबर मान्छे नभएकाले इच्छुक कोही भए सम्पर्क गर्न सामाजिक सञ्जालमा लेखिएको उनी बताउँछन् ।
कृषि कार्यका लागि कामदार चाहिएको उल्लेख गर्दै उनले भने,‘म कुनै एजेण्ट होइन । म कुनै म्यानपावर कम्पनीको मान्छे पनि होइन । पोर्चुगल जानेको संख्या नपुगेर विज्ञापन गरेका हौं ।’
दशैंअगाडि नै सात जना पोर्चुगल पठाइसकेको उनले जानकारी दिए । उनीहरु उता पुगेर काममा लागिसकेको र आफूहरु पनि जाने तयारीमा रहेको गजुरेल बताउँछन् । श्रम स्वीकृतिलगायत सम्पूर्ण प्रक्रिया पूरा गरेर वैध माध्यमबाट पोर्चुगल पुर्याउने गजुरेलको दाबी छ ।
पोर्चुगल जान कम्तिमा १६ लाख रुपैयाँ लाग्ने र भारत पुगेर अन्तरवार्ता दिनुपर्ने उनले बताए । ‘छनौट भएपछि एक महिनाको तालिम दिइन्छ । बाँकी अन्यलाई पनि आफूसँगै पोर्चुगल लगिनेछ,’ गजुरेलले भने ।
FOUNDER/CHIEF EDITOR :