युरोपनेपाली खबर ।
लिस्बन, पोर्चुगल — पोर्चुगलका लागि नवनियुक्त नेपाली राजदूत महामहिम प्रकाशमणि पौडेलले पोर्चुगलका राष्ट्रपति मार्सेलो रेबेलो दि सौसा समक्ष लिस्बनस्थित राष्ट्रपतिको आधिकारिक निवास बेलेम प्यालेसमा सोमबार दिउँसो आयोजित एक विशेष समारोहमा आफ्नो ओहोदाको प्रमाणपत्र बुझाउनुभएको छ।
ओहोदाको प्रमाणपत्र बुझएपछि राजदूत पौडेलले राष्ट्रपति मार्सेलो रेबेलो दि सौसासँग भेटवार्ता गर्नुभएको थियो । सो अवसरमा राष्ट्रपति सौसाले पोर्चुगलका लागि नेपालको पहिलो राजदूतमा नियुक्त हुनु भएकोमा पौडेललाई बधाई दिँदै नेपाल र पोर्चुगलबीचको विद्यमान द्विपक्षीय सम्बन्धलाई अझ प्रगाढ बनाउन सफलताको कामना गर्नुभएको थियो ।
राजदूत पौडेलले राष्ट्रपति सौसालाई नेपालका सम्माननीय राष्ट्रपति रामचन्द्र पौडेलको शुभकामना सन्देश सुनाउँदै नेपालका महामहिम राष्ट्रपतिबाट नेपाल सरकार र पोर्चुगलका जनताप्रति नेपाल सरकार र जनताको सद्भावनाको शुभकामना व्यक्त गर्नुभएको थियो ।
सो अवसरमा राष्ट्रपति सौसाले पोर्चुगलमा रहेका नेपाली इमानदार, मेहनेती र सहयोगी रहेको भन्दै प्रशंसा गर्नु भएको थियो ।
सन् १९७६ सेप्टेम्बर १ तारिख स्थापना भएको नेपाल र पोर्चुगलबीचको दौत्य सम्बन्ध झण्डै पचास बर्ष पुग्न लागेको छ । लामो सुमधुर सम्बन्धप्रति खुशी व्यक्त गर्दै राजदूत पौडेलले आगामी दिनमा नेपाल र पोर्चुगलबीच विविध सम्पर्क र सम्बन्ध अझ मजबुत हुने विश्वास व्यक्त गर्नु भएको छ ।
समारोहमा पोर्चुगलका परराष्ट्र सचिव नुनो साम्पायो, महासचिव फ्रान्सिस्को रिबेरो टेल्स, राजदूत पौडेलकी धर्मपत्नी श्रीमती रुपा पौडेल र दूतावासका द्वितीय सचिव रामबाबु नेपाल लगायत परराष्ट्र मन्त्रालयका उच्चस्तरीय अधिकारीहरुको उपस्थिति रहेको थियो ।
FOUNDER/CHIEF EDITOR :
