पोर्चुगलमा सिसेक्पा तङ्नामको अवसरमा प्राज्ञिक बहसदेखि साँस्कृतिक शुभकामना कार्यक्रमसम्म

युरोपनेपाली खबर, लिस्बन । किराँत याक्थुम चुम्लुङ पोर्चुगलको आयोजनामा लिम्बूहरुको महान पर्व सिसेक्पा तङ्नामको अवसरमा प्राज्ञिक बहस, शुभकामना सहित साँस्कृतिक कार्यक्रमहरु भव्य रूपमा सप्पन्न भएका छन् ।

‘’हाम्रो संस्कार, हाम्रो संस्कृति, हाम्रो पहिचान,नयाँ पुस्तामा हस्तान्तरण हाम्रो अभियान’’ भन्ने नाराका साथ भएको उक्त दुईदिने कार्यक्रमको पहिलो दिन आइतबार लिम्बुवान प्राज्ञिक बहसमा राजकुमार दिक्पाल, रोबोट लिम्बू, विश्वास दीप तिगेला, किशोर सुब्बा र प्रेम लिम्बू लगायतका विद्वान वक्ताहरुले कार्यपत्र पेश गरेका थिए । कार्यपत्र माथि टीप्पणी बहस भएको थियो ।

युरोपका विभिन्न देशमा बसोबास गर्ने याक्थुङ (लिम्बु) हरूको पहिलो पटक युरोप स्तरिय भेला पोर्चुगलको राजधानी लिस्बनमा  २७ र २८ जुलाई २०२५ का दिन भव्यताका साथ सम्पन्न भएको हो । किरात याक्थुङ चुम्लुङ पोर्चुगलको आयोजनामा भएको उक्त भेलाले ३ बुँदे लिस्बन घोषणापत्र जारी गर्दै समुदायको हक, हित र पहिचानका लागि ऐक्यबद्धता जनाएको छ ।

भेलाले जारी गरेको घोषणापत्रमा प्रत्येक वर्ष युरोप स्तरिय भेला आयोजना गर्ने, जसको संयोजन युरोपका विभिन्न मुलुकमा क्रियाशील किरात याक्थुङ चुम्लुङका अध्यक्षहरूको समूहले गर्ने निर्णय गरेको छ । त्यसैगरी, लिम्बुवान पुन:स्थापनाका लागि सम्भव भएसम्म विविध कार्यक्रमहरू सञ्चालन गर्ने र मुक्कुमलुङ अतिक्रमण विरुद्ध जारी आन्दोलनप्रति ऐक्यबद्धता जनाउने घोषणापत्रमा उल्लेख छ ।

लिस्बनको आन्जुसस्थित एभरेष्ट रेस्टुरेन्टमा सम्पन्न भेलामा कियाचु पोर्चुगलका अध्यक्ष रुकमान केरुङ, बेल्जियमका अध्यक्ष बदन योङहाँङ, युकेबाट आएका वक्ता विश्वास दीप तिगेला र  विभिन्न देशका प्रतिनिधिहरूको उपस्थिति रहेको थियो ।

 प्राज्ञिक बहस तथा सांस्कृतिक कार्यक्रम

भेलाको दोस्रो चरणमा ‘लिम्बुवान प्राज्ञिक बहस’ को आयोजना गरिएको थियो, जसलाई कियाचु पोर्चुगलका अध्यक्ष रुकमान केरुङले सहजीकरण गर्नुभएको थियो । बहसमा विभिन्न विषयमा कार्यपत्र प्रस्तुत गरिएको थियो :

– लिम्बूहरूको ऐतिहासिक पक्ष: एक चर्चा : वरिष्ठ पत्रकार तथा इतिहासविद् राजकुमार दिक्पाल

– राजनीतिमा याक्थुङ सहभागिता : विश्वास दीप तिगेला

– मुन्धुम भित्रका विविध पक्ष : प्रेमचन्द्र निङलेखू

– ‘Cardko Lãgi’ : A Collective Moral of Migrant Nepali Agriculture – किशोर सुब्बा लिम्बू    

– From Autonomy to Landlessness: The Limbu Community in Historical and Global Perspective” – रोबर्ट लिम्बू

यस प्राज्ञिक बहसलाई नेपाल आदिवासी जनजाति महासंघ पोर्चुगल तथा पोर्चुगलमा रहेका मातृ संस्थाहरू सहकार्यमा सम्पन्न भएको थियो ।