लिस्बन, १६ अगस्ट । ठकुरी समाज पोर्चुगलले भब्यताकासाथ एक विशेष साँस्कृतिक तथा दर खाने कार्यक्रमको आयोजना गर्ने भएको छ । नेपाली नारीहरुको महान पर्व हरितालिका तीजको अवसरमा सो कार्यक्रम गर्न लागेको हो।
नेपाली कला, संस्कृति र परम्परालाई प्रवासमा समेत जीवन्त राख्ने उद्देश्यले आयोजना गर्न लागिएको यो कार्यक्रम भोलि अगस्ट १७ तारिख आइतबारका दिन लिस्बनको महात्मा गान्धी राधा कृष्ण मन्दिरमा सम्पन्न हुनेछ ।
कार्यक्रमलाई थप आकर्षक र मनोरञ्जनात्मक बनाउन नेपालका चर्चित कलाकारहरुलाई आमन्त्रण गरिएको छ । सुमधुर स्वरकी धनी, लोकप्रिय गायिका रचना रिमालको विशेष प्रस्तुति रहने कार्यक्रममा उहाँलाई अन्य प्रतिभाशाली कलाकारहरुले साथ दिनेछन् । कार्यक्रममा गायिका गीता रेउले, गायिका सरिता कुँवर, गायक सागर शाह तथा गायक फणीन्द्र ठकुरीको पनि बेजोड सांगीतिक प्रस्तुति रहने आयोजक ठकुरी समाज पोर्चुगलका अध्यक्ष सज्जन हमाल ठकुरीले जनाएको छ ।
बेलुकी ४ बजेदेखि सुरु भई राति १० बजेसम्म चल्ने यस कार्यक्रममा पोर्चुगलमा बसोबास गर्ने सम्पूर्ण नेपाली दिदीबहिनी तथा दाजुभाइहरुलाई उपस्थितिका लागि हार्दिक निमन्त्रणा गरिएको छ । कार्यक्रममा हरितालिका तीजको मौलिकतालाई झल्काउने गरी दर खाने कार्यक्रमका साथै विशेष सांस्कृतिक प्रस्तुतिहरु रहनेछन् ।
प्रवासको व्यस्त जीवनशैलीका बीच नेपाली पर्वहरुको महत्व र गरिमालाई कायम राख्दै आपसी भाइचारा र सद्भाव बढाउनु कार्यक्रमको मुख्य लक्ष्य रहेको आयोजकले बताएको छ । यस कार्यक्रमले पोर्चुगलमा रहेका नेपाली समुदायका साथै ठकुरी समुदायलाई एकै ठाउँमा भेला भई तीजको शुभकामना आदानप्रदान गर्ने र मनोरञ्जन गर्ने अवसर प्रदान गर्ने विश्वास लिइएको छ ।
FOUNDER/CHIEF EDITOR :
