पोर्चुगल — पोर्चुगलको आप्रवासन, एकीकरण र शरण एजेन्सी (AIMA) ले विदेशी नागरिकहरूको बसोबास अनुमति (Residence Permit) सम्बन्धी महत्वपूर्ण सूचना सार्वजनिक गरेको छ । नयाँ व्यवस्थाले म्याद सकिएका वा सकिन लागेका वा नवीकरण प्रक्रियामा रहेकाबआवासीय कार्ड भएका लाखौं आप्रवासीहरूलाई राहत प्रदान गरेको छ, त्यस्ता रेजिडेन्सी कार्डहरुको मान्यता १५ अप्रिल २०२६ सम्म कायम हुने जनाइएको छ ।
नियामक डिक्री नम्बर ८४/२००७ को धारा ६३, अनुच्छेद १४ को प्रावधान अनुसार, विदेशी नागरिकहरूको बसोबासको अधिकार उनीहरूको आवासीय अनुमति कार्डको म्याद सकिएको मिति पछि पनि ६ महिनासम्म मान्य रहने कुरा एआईएमएले स्पष्ट पारेको छ । यद्यपि, हालको नवीकरण प्रक्रियामा देखिएको ढिलाइलाई सम्बोधन गर्न थप व्यवस्थाहरू लागू गरिएका छन् ।
गैर-युरोपेली संघका देशहरूका विदेशी नागरिकहरू जसले अहिलेसम्म आफ्नो आवास अनुमति नवीकरणको लागि आवेदन दिएका छैनन्, उनीहरूलाई निम्न परिस्थितिहरूमा मात्र पोर्चुगलमा कानुनी रूपमा बस्न अनुमति दिइनेछ :
१. जुन ३०, २०२५ सम्म म्याद सकिएका कार्डहरूको लागि :
जुन ३०, २०२५ वा सोभन्दा पहिले आवासीय अनुमतिपत्रको म्याद सकिएका व्यक्तिहरूको हकमा, उनीहरूको कानुनी बसोबासको अधिकार अक्टोबर १५, २०२५ सम्म स्वतः मान्य हुनेछ । यदि उनीहरूले अक्टोबर १५, २०२५ सम्ममा नवीकरणको लागि आवेदन दिई शुल्क तिरेको प्रमाण पेश गरेमा, उनीहरूको बसोबासको अधिकार थप ६ महिना, अर्थात् अप्रिल १५, २०२६ सम्म कायम रहनेछ । यो व्यवस्थाले नवीकरण प्रक्रियामा रहेकाहरूलाई कानुनी जटिलताबाट बचाउनेछ ।
२. जुन ३०, २०२५ पछि म्याद सकिने कार्डहरूको लागि :
जुन ३०, २०२५ पछि आवासीय अनुमतिपत्रको म्याद सकिने व्यक्तिहरूको हकमा, उनीहरूको बसोबासको अधिकार कार्डमा उल्लिखित म्याद सकिएको मितिबाट थप ६ महिनासम्म मान्य रहनेछ । यस अवधिभित्र उनीहरूले नवीकरण प्रक्रिया सुरु गरिसक्नुपर्नेछ ।
नवीकरण आवेदन दिइसकेकाहरूका लागि निर्देशन
एआईएमएले पहिले नै आफ्नो आवास अनुमति नवीकरणका लागि आवेदन दिइसकेका विदेशी नागरिकहरूलाई महत्वपूर्ण निर्देशन दिएको छ । उनीहरूले आफ्नो यात्रा वा कुनै पनि आधिकारिक कार्यका लागि आफ्नो म्याद सकिएको पुरानो अनुमतिपत्रसँगै नवीकरण आवेदन पेश गरिएको प्रमाणित गर्ने रसिद (Proof of Application/Payment) अनिवार्य रूपमा बोक्नुपर्नेछ । यो रसिदले उनीहरूको बसोबास कानुनी रहेको प्रमाणको रूपमा काम गर्नेछ ।
किन ल्याइयो यो नयाँ व्यवस्था ?
पोर्चुगलमा आप्रवासीहरूको संख्या बढेसँगै पुरानो निकाय ‘सेफ’ (SEF) लाई प्रतिस्थापन गरी स्थापना गरिएको एआईएमए माथि कार्यबोझ थुप्रिएको छ । लाखौं नवीकरण आवेदनहरू प्रक्रियामा रहेकाले समयमै नयाँ कार्ड जारी गर्न कठिनाइ भइरहेको छ । यही समस्यालाई सम्बोधन गर्न र विदेशी नागरिकहरूलाई कानुनी रूपमा असुरक्षित हुनबाट जोगाउन सरकारले विभिन्न डिक्री-कानुनमार्फत यी व्यवस्थाहरू ल्याएको हो ।
यो स्पष्टीकरणले पोर्चुगलमा बसोबास गरिरहेका हजारौं नेपाली नागरिक लगायत अन्य विदेशीहरूलाई ठूलो राहत दिएको छ, जो आफ्नो आवासीय कार्डको म्याद सकिएर कानुनी स्थिति के हुने हो भन्ने चिन्तामा थिए । सम्बन्धित सबैलाई एआईएमएको आधिकारिक वेबसाइट मार्फत नवीनतम जानकारी लिन र समयमै आफ्नो नवीकरण प्रक्रिया पूरा गर्न अनुरोध गरिएको छ ।
FOUNDER/CHIEF EDITOR :
